Pencarian Dana Gereja GMIM Immanuel Ranowangko

sob, kali ini koman kita mo pake bahasa manado asli dulu mo bahas ni artikel tentang tape Greja di Kampung.

ni brapa minggu ini koman torang pe greja GMIM Immanuel Ranowangko pe sibuk skali. amper tiap hari ada jow tu 'toa' yang ja babunyi - bunyi dari pagi sampe sore. ini toa kwa sebenarnya for ja baca tu sumbangan - sumbangan dari Jemaat yang da bakaseh ato tu ja babli sayor, buah, ikang masa sampe salad fresh di greja.

ini kwa dalam rangka for mo cari akang dana mopake di kegiatan Pertemuan Pemuda se sinode yang mo beking ni bulan Oktober2012. dana yang mosadia for ni kegiatan satu ini bukang sadiki coy, depe banya pokoknya 'ratus juta' tua2 bilang,. hehehe :). pikir jow tu manusia pebanya yang modatang kong nginap pa tong pe kampung Ranowangko tercinta. lantarang so talalu banya tre sampe tu tamu laeng mo tidor di wilayah tanawangko laeng, samadeng borgo, sarani, senduk dll.

bale dulu neh ka leptop! ni ajang cari dana model bagini ta rasa lebe bae daripada tu ja baminta - minta di jalang, beking pastiu kwa kong dapa rasa rendah tu tong pe greja tre. kalo kwa ja bajual bagini stow ada depe bagus. ini kegiatan pertoaan ini kwa ja beking tiap dua kolom. jadi lantarang tong pe greja GMIM di Ranowangko ada 21 so sekitar satu minggu lebeh da babataria di toa. kong tu dana yang da takumpul rata2 amper 5 juta tiap dua kolom/hari. mar koman tu paling banya tu kolom pa Tanta Dei. adoh pa dorang koman riki sampe di 20an juta tu sumbangan,. ckckck. mar tong pe kolom lay nda kalah2 jao kasiang, tong da dapa 12 juta lebeh sadiki. diantara itu ada sumbangan dari Manokowari sekitar 4 juta yang Tanta Tuti daminta lewat telepon pa depe kenalan disana.

brikut neh depe foto -foto tong pe kolom 19 kaima deng kolom langsot yang da gabung waktu cari dana hari Jumat baru -baru.