RSS

permainan tradisional anak Tanawangko, Minahasa, Manado Sulawesi Utara


masa paling indah adalah masa anak2,. itulah kata banyak orang,., mmg butul noch alx waktu itu torang nda perlu mo pikir banya masalah (mancari, karja, ato mo makang apa beso) yang toang tau cuma pulang skolah kong bermaing,. 
brikut tu permainan2 waktu kita masi kacili 

1. Preng,.,
     ni permainan samadeng hide and seek, cuma ini koman pake bola yang ada lapas di tengah tanah kosong kong ada 1 orang bajaga kong depe sisa basambunyi. waktu baru mo mulai ada depe cara sapa mo bajaga,
satu orang buka lima jari lebar2 kong tu oranr2 yang mo iko barmaing taruh depe jare telunjuk di bawah, kong manyanyi ' botinta - botinta 12 tambor sapa botinta dia sombong,., satu, dua, tiga,..,. sapa yang dapa loku dya yang bajaga bola, ato torang biasa bilang depe mut,.,. 
    ni orang ba mut ini mosti cari pa orang basambunyi kong musti bilang depe nama baru bakurebe injang tu bola, kalo dya terlambat ada orang laeng yang lebeh dulu di dekat bola, dorang bole mo skop kase jaaaoooohh spy tu orang yang so dapa loku boleh mo lari ulang,.,., 
  yang garap kwa waktu kita kacili ja bermain deng yafet, ato, fanny, obey, marki, nyanyu, jendri, jems, sani, jein, deng q pe ade inry cs. waktu basambunyi laenk kali so pi pulang ka rumah kong so pi tidor, kong pernah noch itu ato bajaga sampe sore tetap nda dapa pa qt, alx kwa kita so tatidor,., wkkwwkkwk 

2. keketok
  ni permainan koman ada mo bagi 2 grup dulu, mo beking garis (satu di tengah panjang, kong sekitar 3 malintang di pinggir. kong depe cara main 'pokoknya ni grup ini mosti lewat ni 3 garis ini kong bale ulang yang setiap garis so ada orang yang jaga for mo loku kecuali garis tengah boleh 2 orang kalu banya orang yang maen. sapa dapa lewat hitung satu spell kong dorang yang untung. 
yang q inga waktu mo baru mo mulai musti bilang 'tali maso -maso'.

3. kayang
   ni permainan depe inti mo pake tampurung,., kong kalo so selesai biasa ja bilang satu spell. 
ni permainan kwa ada tiga garis malintang kong ada yang torang ja bilang 'skop kuda, manari biapong, ba kayang, oto beep, dll. pokoknya q inga ada yang ba lumpa kong tu tampurung ja taruh di bitis, engkel kaki, sampe di talinga, ada lay ja ba cenge kong gepe tu tampurung deng jare,., wkwkwkwk sayang ni permainan so rupa nda ja dapa lia di kampung

4. gambaran
dulu kalo ni barangy ini koman kita depe jago di komples. cuma ja bawa 100 lembar kong ja pi merantau ka kampung sablah for mo cari tantangan (sampe sore ja pulang riki lupa makang) kong pulang so full tu popoji kiri deng kanan, pokoknya depe kata lain untung banya,., waktu itu kwa q inga itu gembaran pa q ada sekitar 2 bleg khonguan deng 1 dos kong waktu namet2 ja bli q ja jual Rp. 100 for 100 gambaran,,., murah kank,.,  pokoknya kalo mo main ini nga mosti kuasai banya permainan laeng,., misalnya blek -blek, main oleng2 gembaran, lucur2, sampe main kartu bala2 ato qiu2 kong baku bayar deng gembaran lay sob,., depe inti ni gembaran kwa sama pengganti doi kartas for anak2 tempo itu,.,

5. prang tunjung nama
ni permainang ini kwa cocok for laki2, alx mo lari basambunyi kong baku cari bawa2 senjata tiruan dari gabah2,.,., depe aturan ada 2 grup, tu grup 1 mo bilang dimana dorang pe markas supaya dorang boleh mo pigi lebe dulu for mo cari tampa,. kong sekitar 3 mnit itu grup2 mo iko for mo loku pa dorang deng mo cumu tu nama,.,., sapa yang da cumu nama lebe dulu dia untung kong tu kalah mosti kaluar dari komplex itu,., pokoknya ini seru skali alx laeng kali tre tu tamang riki ja basambunyi di kandang babi ( mar bukang babi brana noh katu),., wkwkwkwkk

5. kanikir,.,
 ini koman mungkin sama deng di tampa laeng,., pake 'dai' ato 'gaco'. depe model bermain ada yang ja bilang dai2 ato garis model tangga kong taruh itu kanikir di setiap hook, ada lay yang ja bilang lobang2, ini koman sapa yang sampe 10 dya langsung untung,.,. 

6. bola2..,
pake bola motor ato sepeda lalu bajalang keliling kampung samadeng geng motor mar koman ja balari kong putar2 tu bola motor,.,., 

7. lucur2
 kyapa ja bilang lucur2? lantarang ni pemainan memang musti lucur,., hehhehehe ,., pertama musti pake pantutu botol koman,., baru mo lucur di mesel kong sapa paling dekat ka beton dya mosti lempar ka atas,., tu pantu2 botol yang ta buka(merek mangada ka atas) boleh ngo mo ambe kong tu mangada ka bawah musti kase giliran orang brikut yang mo lempar ka atas,., 
so lantarang ni permainan ini noch sampe q bajalang sampe di borgo sampe ta itang2 deng ta kotor2 di got cuma mo lia pantutu botol cocacola, sprite,fanta, kesegaran,campion dll,., memang kalo mo main ini dulu musti batamang deng botol ato got,.,.,

okay friends itu dulu yang q inga skarang kwa, alx itu so sekitar 15 taon lalu terakhir q ada main,.,. kalo q inga nti q tambah akang,,.,., 


permainan leng kote sama deng:
  •  main bia pake bola kasti,
  • susung2 batu (masi pake bola kasti, kalo kalah dapa gebok).
  • falinggir,., (depe bahasa resmi itu layangan)
  • mandi di kuala kong basalto
  • main bom2 yang ja kase manyabung bku ancor ( ni bom ja beking dari paser kuala)
  • ayang piso dari daong kong depe taji pake duri seho
  • yang terakhir main 'mama papa' ato ba beking sabuah kong baku jual bli,., hehehehe 
doh so boleh jo neh alx so dapa inga tre tu dulu2 waktu da tulis ni artikel ,., ,ciao :)



4 Responses to "permainan tradisional anak Tanawangko, Minahasa, Manado Sulawesi Utara"
Harry Tauran said...

dodorobe dang nda ada.?
napa jeron riki ja dapa feto lantaran ja lupa se makang babi klo ja pi cari gora for jadi depe peluru.^_^
hahaha.....

skarang so nda ja dapa lia tu permainan2 itu eh, kalo stow keketok masih ada.


February 5, 2013 at 5:59 PM
tommy damima said...

och io kote tu dodorobe dari bulu konk pake gora kong tu baju riki banoda2,., klo nda salah jeron ja kase makang gora tu babi2,., wkwk lol :D .


February 5, 2013 at 6:13 PM
Valdy Giovanz said...

leletok nda ada ???


June 19, 2013 at 8:13 PM
tommy damima said...

@Valdy,. kalo nda salah pa torang ja bilang keketok itu,. ada di atas.,.


June 19, 2013 at 11:09 PM

Post a Comment

thanks so baca,. tertarik? kase komen dang,.

 
Return to top of page Copyright © 2010 | Flash News Converted into Blogger Template by HackTutors