Bakusedu kompilasi

Ungke di toko kaset

Suatu hari, Ungke ada pigi di toko kaset.

Ungke: Ko', ada kaset yang "berapa puluh taon lalu"*?

Ko': Haiyaa, disini kaset baru samua.

Ungke (ba kras): Bukang Ko', itu tu lagu yang "papa da kase tinggal"* dang?

Ko': Eh UNGKE...ngana dengar bae-bae ini, Ngana pe Papa nyanda pernah ada kase tinggal kaset disini!

Utu bajual di pasar

Utu ada bajual dimuka pasar Airmadidi. Hari ini dia da bajual rambutan, dia da ambe langsung di kobong. Orang-orang yang da datang pa Utu pe tampa cumang ja barasa, nda ada yang ba bli...

Depe esok, Utu coba bajual langsat yang dia ada pete dimuka rumah. Sama deng tu rambutan, orang cumang da datang barasa, nda ada lei tu ba bli. Sama lei deng hari sebelumnya, dong pe alasan kwa kalu nda asam, talalu manis atau mahal nooo.

So pastiu deng grel tu buah ja abis orang da rasa maar nda ada yang bli, depe esok Utu so nda bajual buah, dia ganti bajual peda.

Kong Utu so mulai bataria bajual, "PEDAA...PEDAAA...OOMMM TANTAA, NAPA KAMARI JO, PI RASA INI PEDA..."

Darah Y

Ceritanya ada Oma mau periksa darah.

Dokter: Oma golongan darah apa?

Oma: Golongan Karya darah Sanger.

Dokter: bukang Oma, maksudnya Oma pe darah apa, A,B,O atau AB?

Oma: Keode Dokter! takira lei apa. Tulis jo darah Y.

Dokter: Ado Oma, nyanda ada komang darah Y.

Oma: Eh Dokter, ngana mo malawang? Itu darah Y darah Yesus yang ada tebus ngana pe dosa.

 maso surga

Suatu hari minggu yang cerah, Enci Ita ada mangajar di sekolah minggu di Gereja. Jadi sementara orang tua iko kebaktian di gereja, dorang pe anak-anak maso sekolah minggu.

Enci Ita batanya pa anak-anak.

Enci Ita: Anak-anak, coba angka tangan siapa dari ngoni yang mo maso surga?

Anak-anak bakurebe ba angka tangan sambil bataria 'Saya, saya saya'. Cumang ada satu tu babadiam nda angka tangan.

Enci Ita: Utu, kiapa ngana nda angka tangan? Ngana nimau maso surga?

Utu: Iyo Enci, kita nda usa jo...

Enci Ita: Kiapa ngana nimau maso surga?

Utu: Papa kwa bilang kita mo maso tentara jo...

Tusuk Gigi

Cerita ini diambil dari wall facebook SMOKOL.com, ditulis oleh Bryan Kho. Maar inga bae-bae ini cuman joke, nda stou terjadi disalah satu rumah makan atau hotel di manado. :))

Ungke kata kerja di rumah makan. Satu kali dia pe Bos pangge mangada.

Bos : "Ungke, kita somo pecat jo pa ngana ne."

Ungke : "Ado, kyapa bos? Apa kasiang ta pe salah?"

Bos : "Bagimana kwa ngana, tiap kali kerja, tu kore2 gigi (tusuk gigi) cuma ja abis pa ngana. Lama2 rugi kita."

Ungke : "Ih bukang kita ja se abis itu. Bos pe anak yang ja pake banyak2. Kita abis pake, kita taruh ulang pa depe tampa..."

Humor Manado: Nonton Rambo

Ini kwa cerita lama, jaman taon 80an. Belum ada stou 21, baru ada bioskop-bioskop biasa.

Utu ada pigi bauni filem, filem Rambo di President, dekat pasar 45. So rapi dia, pake baju gagah deng so pake perfyum lei dia.

Didalam bioskop memang rame, soalnya malam minggu ini, jadi banya orang datang bauni.

Filem so mulai, banyak bertempur deng bakalae, depe cerita kwa ni Rambo ada lari pi di hutang karena polisi-polisi da dusu. Top sekali dang tembak-tembak deng bakalae.

Utu setiap ni Rambo untung, dia ja sadiki bataria...
"Ooo lawang kwa tu Rambo",
"Kacang-kacang ngoni, Rambo mo se abis pa ngoni",
"barol kwa ngoni mo lawang"

amper sepanjang film kwa Utu bakomentar...

Sampe satu adegan, ada ni musuh badekat dari belakang so siap-siap mo tembak pa Rambo. Oooo Utu so tako sekali ni Rambo mo ta kana. So tegang, kage Utu bataria, kuat sekali..."RAMBOOO, ADA MUSUH PA NGANA PE BELAKANG!!"

Dan kebetulan, Rambo babale, lia tu musuh kong Rambo da tembak lebe dulu.

Puas sekali kong Utu bataria "TELE RAMBO, KALO NYANDA KITA,www.smokol.com SO MATI NGANA..."

Humor Manado: Ada apa di Teling

Utu ada batunggu mikro di stasion pagi-pagi, muka sadiki merah baru da bage cap tikus kwa dia...

Sopir (bataria cari cari penumpang): TELIIINGG...TELIINGG...

Kage Utu datang kong kore tu Sopir...

Utu: Ada apa so di Teling?